டிசம்பர் பூவை
பட்டாம்பூச்சி இரசிக்கையில்
மெல்ல மலர்கிறது ஜனவரி.

தொடர்வண்டி வேகமெடுக்க
பின்தங்கி விடுகின்றனவே
துரத்திய மழைத்துளிகள்.

எங்கோ நனைந்ததற்கு
என் வீட்டு சன்னலில்
கரைகிறது காக்கை.

தவற விட்டுச் செல்லும்
கொண்டு வந்த பூங்காற்றை
கோடை மழை.

ஒற்றையடிப் பாதையில்
இரட்டை மாட்டு வண்டி
எழுதிச் செல்கிறது ஹைக்கூ.

நினைவு நாளன்றும்
பூ விற்கிறாள்
மணக்கும் கணவன் நினைவு.

நேற்று விட்டுச் சென்ற
சொச்சத்தையும் வீசிச் செல்கிறது
மாலைத் தென்றல்.

துளசி மாடத்தை
சுற்றி வருகிறது
இல்லத்தரசியின் கூந்தல் நீர்

அலைகளுக்கு சுனாமி பயிற்சி
மேடையமைக்க
உள்வாங்கிடும் கடல்.

தலைவனின் மறைவு
பூதவுடலில் தீக்குளிக்கும்
சந்தன மர வாசம்.

வானவில் மெல்ல மறைய
பரஸ்பரம் முகம் பார்த்திடும்
சூரியச் சந்திரன்.

அணையுமுன் பிரகாசம்
மெல்லக் கரையும் மணியோசை
தூரத்து தேவாலயம்.
 

உங்கள் கருத்து மற்றும் படைப்புக்களை
 editor@tamilauthors.com  என்ற மின் அஞ்சல் முகவரிக்கு அனுப்பவும்