பொங்கி மகிழ்ந்தோம் பொன்கொழிக்கும் ஈழத்தில்

செங்கோலின் சீர்கேட்டால் செந்தமிழாள் – பங்கமுற

உள்ளக் குமுறலால் ஊனமுற்ற வாலிபர்கள்

மெள்ள எழுந்தார் எதிர்.

போர்ச்சூழல் காரணமாய்ப் போக்கிடம் தேடியே

சீர்கெட்ட நாடிருந்தே தேர்ந்தெடுத்த – பார்சென்றே

வாழ்விடத்தைத் தேடியே வாழ்கின்றார் மக்களின்று

தாழ்விலா வாழ்வவர்க்குத் தான்.

இன்முகம் காட்டியே இன்புடன் ஏற்றெம்மை

உன்னத வாழ்வளித்த உத்தமியாள் – அனபுசால்

அன்னை கனடாவின் ஆதரவால் இன்றுநாம்

இன்னலின்றி வாழ்கின்றோம் ஈங்கு.

தாய்நாட்டுப் பொங்கல் தனித்துவம் கொண்டதுவே

ஐயமின்றி என்சிந்தை அங்குசெல்ல – தொய்வுகொள்

என்னுடலோ செய்வதறி யாதேங்கும் காட்சியிங்கு

இன்னல்தான் எஞ்சும் எதிர்.

பனிபடர்ந்த பூமியிது பார்வைக் கழகு

இனிப்பான பொங்கலில்லை ஏற்ற – தனித்துவம்

ஏதுமில்லை முற்றமோ வெண்பூச்சு என்செய்ய

பாதுகாப்பு இங்குண்டு பார்.

மின்னடுப்புப் பொங்கல் மிகையாக ஏதுமில்லை

அன்பைப் பொழியும் அனைவரும் – பன்னோக்காய்

அங்கிங்கு சென்றதனால் அன்பு மனையாள்

தங்கியே பொங்குகிறாள் தான்.

சுவைக்குமா இப்பொங்கல் சூழாத சுற்றம்

தவறான காலநிலை தப்பிவரும் ஆதவன்

ஏதுமற்ற நேரத்தில் ஏற்றுத்தான் பொங்குகிறோம்

தீதேது மில்லைத்தான் தேர்.

வீட்டின் நடுவினிலே வித்தகஞ்சேர் கோலமிட்டே

கூட்டுப் பொறுப்புடனே கூடியொன்றாய் – வேட்புடனே

மின்னடுப்பு வைத்தே மிகநெருப் பின்றியே

உன்னதமாய்ப் பொங்கிமகிழ் வோம்.

புலம்பெயர் நாட்டின் புதுச்சுவைப் பொங்கல்

கலகலப்பாய்க் கொண்டாடும் காலம் – சிலரின்

பெருமுயற்சிப் பேறு மரபுசால் திங்கள்

பெருவிருந் தெங்கள் பெருமை.

ஓய்வான நாளொன்றில் ஒன்றுகூடி நம்கலையை

தேய்வின்றித் தேர்ந்த கலைஞர்கள் – காய்வின்றி

மக்கள்முன் தம்திறனைக் காட்டி மனநிறைவைப்

பக்குவமாய்ப் பெற்றிடுவர் பார்.

உங்கள் கருத்து மற்றும் படைப்புக்களை
 editor@tamilauthors.com  என்ற மின் அஞ்சல் முகவரிக்கு அனுப்பவும்