தொழிலாளர் நாங்கள்

புலவர் முருகேசு மயில்வாகனன்

சிந்து

செய்யும் தொழிலே – தெய்வம்

தேர்ந்து கொண்டாலே தேறுமே வாழ்வு

வையம் சிறக்கவே – நாங்கள்

வாய்ப்பாய்த் தொழில்செய்து வாழ்வில் உயர்வோம்

தெய்வம் நமக்குத் -  துணையே

தேசியம் காக்கவே தேர்ந்த தொழில்களை

மெய்யை வருத்தியே செய்து மகிழ்வோம்.

 

ஆடைகள் நெய்வோம் – மற்றும்

ஆலைகள் தோறும் அரும்பணி செய்வோம்

மூடைகள் தூக்குவோம் – முனைப்பாய்

மாற்றுத் தொழில்களை மனமாகச் செய்வோம்

காடுகள் வளர்ப்போம் – களனிகள்

காலத்துக் கேற்பவே காய்கறித் தோட்டங்கள்

மாடு வளர்ப்பது – எங்கள்

மாண்பான தொழிலென்று மார்தட்டி சொல்வோம்.

 

கூலித் தொழிலாளர் – நாங்கள்

கூடித் தொழில்செய்தே கூடி மகிழ்வோம்

ஆலைத் தொழிலாளர்க்கு – ஆங்கு

ஆற்றும் தொழிலுக்கு ஆனதோர் சங்கம்

வேலை நிறத்தத்தை – விரும்போம்

வெற்றியைக் காண்போம் விரைவிற் பேசியே

சீலமுடைத் தொழிலாளர் – நாங்கள்

செய்யும் தொழிலைச் சீராகச் செய்வோம்.

 

வேலை தருனரோடு – வேட்பாய்க்

கலந்து பேசியே காண்போமே வெற்றி

சீலத்தைக் காக்கும் – சிந்தையர்

சிறப்பாய்ப் பணிசெய்தே சீர்பெறு வோமே

காலத்துக் கேற்பவே – காண்போம்

கடின உழைப்பாலே காட்டுவோம் வெற்றி

மூல முதலீடு – செய்வோர்

முற்றுந் தெரிந்த தொழிலகம் காண்பர்.

‘குதர்க்கம் விளைத்தே – பெருங்

கொள்ளை யடித்திட்ட கோடீஸ்வர ர் பலபேர்

எம்ரத த்தைப்பிழிந்தே - சொத்தை

வடிகட்டி எம்மைத் துடிக்க விட்டீரே

நிதியின் பெருக்கம் – விளை

நிலமுற்றும் உங்கள் வசமாக்கி விட்டீரே’

சதிசெய எண்ணிடில் – நாங்கள்

சாதித்துக் காட்டுவோம் சலிப்பேது மின்றியே!