புலவர் முருகேசு மயில்வாகனன்

சிம்மக் குரலோனே சிங்கார வேலவனே

தம்மையே தானறிந்த தத்துவனே – விம்மவைத்தாய்

பாரெங்கும் உள்ளோரைப் பாடிய பாட்டாலே

பேரோடு சென்றாயே பார்.

பார்போற்றும் பாலாவே பாரைவிட்டுச் சென்றுவிட்டாய்

சீரோடு வாழ்ந்தே சிறப்புற்றாய் – பேரெடுத்தாய்

தேனொத்த சிம்மக் குரலாலே மக்களிடம்

வானுயர்ந்து நின்றாயே வாழ்த்து.

செந்தமிழில் தேர்ச்சிபெற்றே செப்பமாம் உச்செரிப்பு

எந்தமொழிப் பாடலையும் ஏறெடுத்தே – சொந்தமொழி

போலவே அம்மொழியார் போற்றிடப் பாடிடுவாய்

சீலம் நிறைந்தாய் சிறந்து.

சிறுவர் பெரியரெனச் சிந்தையிற் கொள்ளாய்

இறுதிவரை யாரையுமே ஏற்று – உறுதிபட

இன்முகங் காட்டி ஏற்றவற்றைச் செய்திடுவாய்

அன்பால் அரவணைப்பாய் ஆம்.

பாட்டால் உயர்ந்தவனே பண்பும் அதுவேதன்

கூட்டுப் பொறுப்பால் குதுகலித்தாய் – ஈட்டினாய்

செல்வாக்கும் சேர்ந்துகொள்ள சேய்கள் மனையாளும்

ஆல்போல் உயர்த்தினரே ஆம்.