தைத்திரு நாளிதைப் போற்றிடுவோம்

கவிஞர் மாவிலி மைந்தன், சி.சண்முகராஜா, கனடா



தமிழர்தம் மரபினிற் தோன்றியதை – இந்தத்
       தாரணி போற்றிட ஓங்கியதை
அமிழ்தின் அருஞ்சுவை ஆகியதை - மன
      ஆழத்திலே உறைந்து ஊறியதை!

சேற்றினிலே ஏரைச் செலுத்தியதை – வேர்வை
      சிந்தியே உழவர்கள் செதுக்கியதை
சோற்றினை யாவர்க்கும் வழங்கியதை – ஞாலம்
      சூழ்ந்த பசிதனை விரட்டியதை!

ஏறு தழுவலை ஏற்றியதை - பல
      ஏற்றம் மிகுசெய லாற்றியதை!
வீறுகொள் வீரத்தைப் போற்றியதை – புகழ்
     விஞ்சும் மரபினைச் சாற்றியதை!

சாதி மதபேதம் நீக்கியதை – நற்
      சமத்துவப் பாதையை ஆக்கியதை!
நீதி நெறிகளைச் சாற்றியதை – நம்
     நெஞ்சுக்குக்; குறள்நெறி சாற்றியதை!

உள்ளத்தில் நம்பிக்கை யூட்டியதை – எம்
     ஒற்றுமைக் கேதிசை காட்டியதை
கள்ள மிலாஅன்பை நாட்டியதை – இன்பக்
     காதலில் மெய்யுற வூட்டியதை!

தைத்திரு நாளிதைப் போற்றிடுவோம் - செந்
     தமிழர்தம் மரபினைக் காத்திடுவோம்!
இத்தரைத் துன்பங்கள் போக்கிடுவோம் - ஏழ்மை
    இலையெனும் உலகொன்றை ஆக்கிடுவோம்!

பொங்குக பொங்கல் பொலிவுறவே! – துயர்
    போகட்டும் ஞாலம் உயர்வுறவே!
மங்கலம் தங்கட்டும் மகிழ்வுறவே - இங்கே
    மானிடம் வெல்லட்டும் புகழ்பெறவே!





                

உங்கள் கருத்து மற்றும் படைப்புக்களை
 editor@tamilauthors.com  என்ற மின் அஞ்சல் முகவரிக்கு அனுப்பவும்