மூத்தோர் என்றால் ...?  

மன்னார் அமுதன்                   

மூத்தோர் என்பவர் மூப்பல்ல; அவர் 
முதிர்ச்சியைக் குறிப்பது வயதல்ல; வாக்கால்
காத்தோர் எவரோ சமூகத்தை; எல்லாம்
மூத்தோரென நான் முன்மொழிவேன்

பழமை பேசுதல் நோக்கமல்ல - பழம்
பெருமையைச் சாற்றுதல் ஆக்கமல்ல
ஊக்கம் தருமுரை எவ ருரைத்தாலும்
மூத்தோர் வாக்காய் நானேற்பேன்

உவமைக் கதைகள் பல சொல்லி
உயர்ச்சியில் பணிவை வலியுறுத்தி
கயமைக் குணத்தை நீக்கிவிட - பல
கதைகள் உரைத்தோர் மூத்தோரே

மரத்தின் நிழலில் நின்று கொண்டே
வேரைத் தூற்றுதல் நலமோ சொல்
மரத்தின் உவமை மனிதருக்கே -இதை
உணரா மனிதர்கள் மரத்திற்கே

ஏற்றுக் கொள்ளும் மனமிருந்தால்
எதையும் கற்கும் ஆர்வம் வரும்
மூத்தோர் உரைகள் மருந்தாகும் - அதை
மதித்தால் வாழ்க்கை விருந்தாகும்

amujo1984@gmail.com