என்னசெய்வது...?
சபா. அருள்சுப்பிரமணியம்.
என்னசெய்வ தென்றெமக்குத் தெரியவில்லையே – எங்கள்
இனஅழிப்பைத் தடுக்கவழி புரிய வில்லையே
கண்ணைக்காதை முழுஉலகும் பொத்திவிட்டதோ? – பாரில்
கருணைநீதி நேர்மையெல்லாம் செத்து விட்டதோ?
பத்துநூறு என்றதின்று
ஆயிரமாச்சு – வன்னி
பகலிரவாய்
உயிர்பறிக்கும் கொலைக் களமாச்சு
செத்தவீட்டுச் செய்திவரா ஈழவனில்லை – நாங்கள்
சேர்ந்தெழுப்பும் ஓலமென்ன கேட்க வில்லையா?
சொந்தபந்தம் சாகுதென்று
துடிதுடிக்கிறோம் - உலகம்
சுற்றறிக்கை விட்டுநாளைக் கடத்திச் செல்வதேன்?
வெந்தபுண்ணில் வேல்சொருகும் வார்த்தையெதற்கு - இங்கு
விடிவுதரும் காரியத்தை விரைந்து
ஆற்றுமா?
நித்திரையை நாமிழந்து
மாதங்களாச்சு – எங்கள்
நிம்மதியை நாம்தொலைத்து ஆண்டுக ளாச்சு
இத்தரையில் உரிமைகேட்டு அறுபதாண்டுகள் - நாங்கள்
எத்தனையை இங்கிழந்து ஏதிலி யானோம்
படையிற் சிறார் சேர்வதாக
ஓலமிடுகிறார் - அங்கு
பாலர்கொல்லப் படுதல்கண்டேன் மௌன மாகினார்
விடைதெரியா திங்குநாங்கள் அலமலக்கிறோம் - எங்கள்
வேதனைக்கோர் முடிவுகேட்க ஒன்று கூடினோம்
முடிவுஎன்ன என்றுநாங்கள்
அங்கலாய்க்கிறோம் - இந்த
முழுஉலகும் சேர்ந்துதங்கள் பங்கை யாற்றுமா?
விடிவு'தனி நாடு'என்று துணிந்துகூறுமா? – எங்கள்
விழிகளிலே நம்பிக்கையின் ஒளியை ஏற்றுமா?
(905) 479 – 5375
|
